झापा। कनकाई मावि सुरुङ्गाको खेल मैदानमा मंसिर २८ गतेदेखि चौथो पालिका स्तरीय कनकाई नगरकप फुटबल प्रतियोगिता हुने भएको छ ।
कनकाई खेलकुद प्रतिष्ठानले सुरुङ्गामा पत्रकार सम्मेलन गरी प्रतियोगिताको तयारी पूरा गरिसकेको जानकारी दिएको हो ।
प्रतिष्ठानका अध्यक्ष दुर्गा प्रसाईले अघिल्ला प्रतियोगिता भन्दा यस वर्षको पुरस्कार राशी वृद्धि गरिएको बताए ।
प्रतियोगितामा प्रथम पुरस्कार १ लाख ११ हजार १ सय ११ र दोस्रो पुरस्कार ५५ हजार ५ सय ५५ रुपैँया राखिएको छ । प्रथम पुरस्कार कनकाई नगरपालिका र दोस्रो पुरस्कार गएको वर्ष विजेता झापा गाउँपालिकाले प्रायोजन गर्ने भएको छ ।
प्रतियोगितामा हरेक म्याचको म्यान अफ द म्याच र फाइनलका दिन विधागत तर्फका खेलाडीलाई नगदसहित पुरस्कृत गरिने भएको छ ।
प्रतियोगिताको उदघाटन खेल कनकाई नगरपालिका र बुद्धशान्ति गाउँपालिका वीच हुने खेलाडी व्यवस्थापन समितिका संयोजक विनोद राना मगरले बताए ।
प्रतियोगितामा कनकाई नगरपालिकासहित बुद्धशान्ति, झापा, गौरीगंञ्ज, बाह्रदशी, हल्दिबारी, कमल गाउँपालिका छन् भने बिर्तामोड, शिवसताक्षी, दमक र अर्जुनधारा नगरपालिकाको सहभागिता रहने भएको छ । प्रतियोगिता सम्पन्न गर्न राजेन्द्र उप्रेतीको संयोजकत्वमा १७ सदस्यीय मूल समिति र विभिन्न उपसमिति निर्माण गरिएको छ ।
