News Portal

  • झापाको धुलाबारीमा तेस्रो अन्तर्राष्ट्रिय औद्योगिक व्यापार, कृषि तथा पर्यटन महोत्सव शुरु

    रातोपोस्ट संवाददाता
    ३१७ पटक

    झापा। एक नम्बर प्रदेश सरकारका मुख्यमन्त्री शेरधन राईले ‘सुखी नेपाली, समृद्ध नेपाल’ को सपना साकार पार्न अन्तर्राष्ट्रिय औद्योगिक व्यापार महोत्सवले सघाउ पुर्याउने बताएका छन् ।

    मेची उद्योग वाणिज्य संघले झापाको धुलाबारीमा आयोजना गरेको तेस्रो अन्तर्राष्ट्रिय औद्योगिक व्यापार कृषि तथा पर्यटन महोत्सवको बुधबार उद्घाटन गर्दै उनले सो कुरा बताएका हुन् ।

    पर्यटन भ्रमण वर्ष २०२० लाई सार्थकता प्रदान गर्न महोत्सवको भूमिका महत्वपूर्ण रहने मुख्य मन्त्री राईको भनाई थियो । एक नम्बर प्रदेशलाई देशकै नमूना र समृद्ध प्रदेशको रुपमा विकास गर्न लागिएको चर्चा गर्दै उनले आगामी १० वर्षभित्रमा प्रदेश १ ले हरेक क्षेत्रमा समृद्धि हाँसिल गर्ने बताए ।

    सरकारले सुरु गरेको नयाँ नेपाल निर्माणको अभियानलाई साकार बनाउन तीनै तहको सरकार क्रियाशील भएर लागेको उल्लेख गर्दै मुख्यमन्त्री राईले आगामी ५ वर्षभित्रमा प्रदेश १ मा १५ सय मेघावाट क्षमताको विद्युत उत्पादन गर्ने र १० वर्षभित्रमा बेरोजगारी समस्या अन्त्य गर्ने दावी गरे ।

    कृषि तथा पर्यटन प्रवद्र्धनका लागि प्रदेश सरकारले २० करोड रुपैयाँ विनियोजन गरेको बताउँदै उनले निजी क्षेत्रको सहकार्यमा प्रदेशको विकासमा आफ्नो ध्यान केन्द्रीत हुने बताए । मुख्यमन्त्री राईले महोत्सवले उद्योग, पर्यटन तथा कृषिमा योगदान पुर्याउने भन्दै आयातलाई प्रतिष्थापन गर्ने गरी स्वदेशी उत्पादन बढाउन आग्रह गरे । निर्यातमा देखिएका जटिलतालाई सरकारले नीतिगत रुपमै निर्णय गरेर समाधान गर्ने उनको भनाई थियो ।

    पर्यटन वर्ष २०२० शुभारम्भको पूर्वसन्ध्यामा आयोजित महोत्सव उद्घाटनका क्रममा हेलिकप्टर उडाएर आकाशबाट कार्यक्रमस्थल परिसरमा पुष्पवृष्टि गरिएको थियो । उद्घाटन समारोहमा प्रदेशसभा सदस्य गोपाल बुढाथोकी, राधा थापा, मेचीनगर नगरपालिकाका प्रमुख विमल आचार्य, नेपाल उद्योग वाणिज्य महासंघका केन्द्रीय सदस्य तथा मेला उत्सव समितिका संयोजक दिलसुन्दर श्रेष्ठ, महासंघ प्रदेश नम्बर १ का अध्यक्ष नरेन्द्रकुमार खड्का, नेपाली काँग्रेस झापाका उपसभापति राम कट्टेललगायतले शुभकामना मन्तव्य राखेका थिए ।

    संघका अध्यक्ष ऋषिराज तिम्सिनाको अध्यक्षतामा सम्पन्न महोत्सवको उद्घाटन सत्रमा महोत्सव आयोजक समिति संयोजक भूमि पौडेलले कार्यक्रमको औचित्यमाथि प्रकाश पारेका थिए । सो कार्यक्रमको सञ्चालन संघका महासचिव ध्रुव कनालले गरेका थिए ।

    आगामी पुस १७ गतेसम्म सञ्चालन हुने आयोजकले जनाएको छ । विभिन्न वस्तु तथा सेवाका २ सय १० वटा स्टल राखिएको महोत्सवमा १४ वटा बंगलादेशका, ५ वटा भारतका र दुईवटा पाकिस्तानका स्टल छन् । महोत्सवको मुख्य प्रायोजकमा एशियन थाई फुड्सको उत्पादन रमपम तयारी चाउचाउ छ भने मेचीनगर नगरपालिका प्रमुख संरक्षक रहेको छ ।

    प्रतिकृया दिनुहोस्