दिल्ली । भारतले आज देशभर राष्ट्रिय लकडाउन घोषणा गरेको छ । जसको असर सीमापार मुलुकबाट भारत भित्रिने भारतीयहरुलाई परेको छ ।
बंगलादेशबाट भारत आउन लागेका करिब १ सय चिकित्सा विद्यार्थीहरु बंगलादेश-भारत सीमामा अलपत्र परेका छन् । उनीहरुलाई भारत प्रवेश गर्न दिइएको छैन ।
बेनापोल सुख्खा बन्दरगाहका उपनिर्देशक मोहम्मद ममुन कबिर तारफ्देरले बीबीसीलाई भने, “बंगलादेशले विद्यार्थीलाई त्यहाँबाट जान आदेश गरेको छ । तर, भारतीय अधिकारीहरु उनीहरुलाई प्रवेश गर्न दिएका छैनन् ।”
कोरोना भाइरसको संक्रमण नियन्त्रणको प्रयासस्वरुप बंगलादेशका सम्पूर्ण शैक्षिक संस्थाहरु बन्द गरिसकेको छ ।
सीमामा अलपत्र परेका करिब सय विद्यार्थी भारत प्रशासित काश्मीरका रहेको ममुनले जानकारी दिए ।
उनले भने, “यहाँ अलपत्र परेका सबैसँग भारतीय पासपोर्ट छ, वैधानिक भिसा छ । त्यसकारण यस्तो अवस्थामा के गर्ने भन्ने हामी अन्योल छौं ।” बीबीसी
