काठमाडौं। उदयपुरका १२ जनालाई कोभिड-१९ देखिएका विराटनगरस्थित कोशी अस्पतालको कोरोना विशेष अस्पताल भर्ना गरिएको छ। उनीहरूलाई राति १२ बजे अस्पतालको आइसोलेसन कक्षमा भर्ना गरिएको प्रदेश १ मुख्यमन्त्री कार्यालय कोरोना सूचना केन्द्रले जनाएको छ।
त्रियुगा नगरपालिका-३ भुल्केस्थित मस्जिदमा रहेका भारतीय र केही नेपालीहरूसमेत १२ जनामा हिजो कोरोना भाइरस संक्रमण पुष्टि भएको थियो। ३४, २९, २६, २२, २५, २०, ४०, २९ र चारजना २८ वर्षीय पुरुषमा कोभिड-१९ देखिएको स्वास्थ्य मन्त्रालयले जनाएको छ।
टेकुस्थित राष्ट्रिय जनस्वास्थ्य प्रयोगशालामा पठाइएको थ्रोट स्वाबको नमूना पोजिटिभ देखिएको सूचना पुगेपछि गएराति ४ वटा एम्बुलेन्सबाट उनीहरूलाई विराटनगर लगिएको हो।
मस्जिदमा रहेका अन्य चारजनालाई पनि एम्बुलेन्सबाट चिकित्सकको निगरानी र थप परीक्षणको लागि विराटनगर पुर्याइएको छ। राति ११ बजे अस्पताल पुर्याइएका उनीहरूलाई अस्पतालले आवश्यक प्रक्रिया पुर्याएर भर्ना गरेको छ।
नेपाल पत्रकार महासंघ उदयपुरका अध्यक्ष भरत खड्काले प्रहरीले संक्रमित फेला परेको भुल्के र आसपासको क्षेत्रलाई सिल गरेर आवतजावत ठप्प पारेको जानकारी दिए।
स्वास्थ्य कार्यालय उदयपुरका प्रमुख मोहन सुवेदीका अनुसार संक्रमितको प्रत्यक्ष सम्पर्कमा रहेका व्यक्तिहरूको पहिचान गरी परीक्षणको दायरा बढाउने र अबको योजना तय गर्न बिहान ८ बजे जिल्ला प्रशासन कार्यालयमा बैठक डाकिएको छ।
“मैले प्रदेश सरकारसँग समन्वय गरिरहेको छु। विराटनगरबाट परीक्षणको लागि आवश्यक उपकरणसहित प्राविधिक टोली पठाउने कुरा भएको छ। बैठकबाट रणनीति तय गर्नेछौं”, सुवेदीले बताए।