झापा। मेचीनगर नगरपालिका वडा नम्वर – ८ ले सरकारबाट दिइने सामाजिक सुरक्षा भत्ता घर–घरमा पुर्याउन थालेको छ । मेचीनगर–८ का वडाध्यक्ष विकेन्द्र धिमाल र वडा सदस्य सन्तोष मेचेले बिहिवार वडाबासीको घर–घरमै पुगेर सामाजिक सुरक्षा भत्ता वितरण गरेका छन् ।
लकडाउनका बेला अति आवश्यक काम बाहेक आवत जावतमा बन्द हुँदा वडाबासीलाई अहिले दैनिकीमा समस्या परिरहेको छ । त्यसमा पनि एकल महिला, अपाङ्गता भएका र बृद्ध बृद्धालाई झन ठुलो समस्या परिरहेको हुँदा उनिहरुलाई सरकारबाट दिइने सामाजिक सुरक्षा भत्ता घर–घरमा पुर्याउन थालिएको वडा अध्यक्ष विकेन्द्र धिमालले बताए ।
विहिवार मात्र १ सय जनाको घर–घरमै पुगी सामाजिक सुरक्षा भत्ता वितरण गरेको वडा सदस्य सन्तोष मेचेले बताए । उनका अनुसार वडामा बृद्ध भत्ता, एकल महिला, अपाङग र लोपोन्मुख जातीलाई सामाजिक सुरक्षा भत्ता वितरण गरिएको जानकारी दिए ।
घरमै भत्ता आएपछि वडाबासी भने दङ्ग भएका छन् । लकडाउनका कारण नोकरीमा रहेका छोराछोरीले घर खर्च पठाउन असहज बनि रहेका समयमा बृद्धबृद्धाले राहत महशुस गरेका छन् ।