रातोपोस्ट संवाददाता
काठमाडौं । शनिवार बिहान स्वास्थ्य तथा जनसंख्या मन्त्रालयका सहप्रवक्ता समिरकुमार अधिकारीले नेपालमा थप ७ जनामा कोरोना संक्रमण देखिएको पुष्टि गरेका हुन् । यससँगै नेपालमा कोरोना भाइरस संक्रमितको संख्या १ सय ९ पुगेको छ ।
अधिकारीका अनुसार उदयपुरको भुल्केका १५, १८ र ६५ वर्षका महिला र कपिलवस्तुमा १७, १८, १८ वर्षका पुरूस र पर्सा छपकैयाका ६२ वर्षका पुरुषमा कोरोना संक्रमण देखिएको हो ।
राष्ट्रिय जनस्वास्थ्य प्रयोगशाला काठमाडौं र कोशी अस्पताल विराटनगरको प्रयोगशालामा गरिएको परीक्षणमा उनीहरूमा कोरोना संक्रमण देखिएको हो । उनीहरूको स्वास्थ्य अवस्था सामान्य रहेको र चिकित्सकको निगरानीमा राखिएको मन्त्रालयले जनाएको छ ।