काठमाडौं, असार ४। संसदमा विचाराधीन नागरिकता विधेयकमा सहमति जुटाउन प्रधानमन्त्री केपी ओलीले नेपाली कांग्रेसका नेताहरूसँग छलफल गरेका छन् । २०७५ साल भदौ ५ गतेदेखि नागरिकता विधेयक संसदको राज्य व्यवस्था तथा सुशासन समितिमा विचाराधीन छ ।
छलफलमा सत्तारुढ दलका तर्फबाट प्रधानमन्त्रीसहित अर्का अध्यक्ष पुष्पकमल दाहाल प्रचण्ड, नेकपा संसदीय दलका उपनेता सुवास नेम्वाङ लगायत नेता सहभागी छन् । सो छलफलमा नेपाली कांग्रेसका तर्फबाट उपसभापति विमलेन्द्र निधि, नेता कृष्ण सिटौला र मीनेन्द्र रिजाल सहभागी छन्।
संसदको राज्य व्यवस्था तथा सुशासन समितिमा अंगीकृत नागरिकताको विषयमा सहमति कायम हुन सकेको छैन । समितिले बुधबार नागरिकता विधेयकमा पाँच दिनभित्र सहमति कायम गर्न सरकारलाई निर्देशन दिएको छ ।
अहिले नेपाल नागरिकसँग विवाह गरेपछि विदेशी महिलाले अंगीकृत नागरिकताका लागि आवेदन दिन पाउने व्यवस्था छ । समिति सभापति शशि श्रेष्ठले नेपाली पुरुषसँग विवाह गर्ने महिलाले ७ वर्षपछि मात्र नागरिकता पाउने प्रस्ताव गरेकी छिन् ।
उनको प्रस्तावमा त्यसरी विवाह गरेर आएकी बुहारीलाई बिहे गरेर आएको सात वर्षसम्मका लागि आर्थिक, सामाजिक र संस्कृतिक अधिकार उपभोग गर्न पाउने गरी स्थायी आवासीय अनुमति पत्र दिन प्रस्ताव गरिएको छ ।