रातोपोस्ट संवाददाता
काठमाडौं, साउन २ । नेपालमा कोरोना भाइरसको संक्रमणबाट मृत्यु हुनेको संख्या ४० पुगेको छ । बिहीबार राति सवा १० बजे सप्तरीको राजविराजका ७३ वर्षीय वृद्धको मृत्यु भएसंगै संक्रमणबाट मृत्यु हुनेको संख्या ४० पुगेको स्वास्थ्य तथा जनसंख्या मन्त्रालयका प्रवक्ता डा. जागेश्वोर गौतमले बताए ।
मुटुका रोगी उनको स्वास्थ्यमा समस्या देखिएपछि असार ३१ गते बिपी कोइराला स्वास्थ्य विज्ञान प्रतिष्ठान पुर्याएको थियो । नेपालमा कोरोना संक्रमितको संख्या १७ हजार ४ सय ४५ पुगेको छ । पछिल्लो २४ घण्टामा १०१ जना नयाँ संक्रमित थपिएसंगै जम्मा संक्रमित १७ हजार ४ सय ४५ पुगेको प्रवक्ता गौतमले बताए।
२४ घण्टामा २ सय ८५ जना कोरोना जितेर डिस्चार्ज भएका छन् । हालसम्म कोरोनाबाट निको हुनेको संख्या ११ हजार ५ सय ३४ पुगेको मन्त्रालयले जनाएको छ । निको हुनेहरु ६६ दशमलव एक दुई प्रतिशत हुन् ।
