रातोपोस्ट संवाददाता
पर्सा, २९ असाेज। पर्सामा लागुऔषध तस्कर र प्रहरीबीच झडप भएकाे छ। पर्साको ठोरी गाउँपालिका स्थित जंगलछेउको ओरिया खोलामा प्रहरी र लागुऔषध तस्कर समूहबीच बुधबार राति झडप भएको प्रहरीले जनाएकाे छ ।
हातहतियारसहित आएको तस्कर समूहले प्रहरीमाथि फायर खाेलेपछि प्रहरीले पनि दुई राउन्ड हवाई फायर गरेको इलाका प्रहरी कार्यालय ठोरीका प्रमुख प्रहरी निरीक्षक अशोक साहले जानकारी दिए । उनका अनुसार हतियारसहित चारजनालाई प्रहरीले पक्राउ गरेको छ ।
पक्राउ परेकाहरूबाट एक थान भरुवा बन्दुक, त्यसमा प्रयोग हुने चार राउन्ड गोली र एक थान खुकुरी बरामद भएको उनले बताए । लागुऔषध गाँजा आइरहेको सूचनाको आधारमा बगरमा प्रहरी खटाइएको प्रहरी निरीक्षक साहले बताए । उनीहरूलाई जिल्ला प्रहरी कार्यालयकाे हिरासतमा राखेर अनुसन्धान भइरहेको उनले बताए ।