काठमाडाैँ, ०१ कात्तिक।  आज घटस्थापना अर्थात्, नवरात्रीकाे प्रथम दिन ।  असोज शुक्ल प्रतिपदादेखि सुरु हुने बडादसैं आजदेखि सुरु भएको छ ।  असोज शुक्ल पूर्णिमासम्म १५ दिन दुर्गापक्षमा धूमधामका साथ मनाइने बडादसैंको पहिलो दिन आज घरघरमा विधिपूर्वक दियो, कलश र गणेश स्थापनासहित जमरा छरेर  घटस्थापना गरिन्छ । विधिपूर्वक शक्तिकी देवी मानिने दुर्गा माताको आह्वान गरी पूजारम्भ गरीन्छ।

नवरात्रको पहिलो दिन आज घटस्थापनाको साइत आज बिहान ११ : ४६ बजे रहेको नेपाल पञ्चाङ्ग निर्णायक  समितिले जनाएको छ । आज दिनभर चित्रा नक्षत्र परेकाले शास्त्रीय वचनानुसार मध्याह्नकालमा अभिजित् मुहूर्तको साइत घटस्थापनाका लागि दिइएको  समितिका अध्यक्ष प्रा‍. डा. रामचन्द्र गौतमले बताए ।

आजकाे दिन नजीकको नदी वा चोखो स्थलबाट बालुवा वा माटो ल्याई गाईको गोबरले लिपपोत गरिएको पूजाकोठामा विधिपूर्वक राखेर त्यसमाथि जौ,धान,मकै,  गहुँ आदि समावेश गरी जमरा  रोपिन्छ ।

विधिपूर्वक घट अर्थात् घडा राखी त्यसमाथि शक्तिस्वरुपा दुर्गाको पूजाराधना गरिने आजको दिन स्थापना गरिएको पूर्ण कलशको जलले अभिषेक गरी विजयादशमीका दिनमा देवीको प्रसाद ग्रहण गरिन्छ ।