मेचीनगर, ६ फागुन । धुलाबारी बजार क्षेत्रले मेचीनगर ९ मा सम्पन्न प्रथम वडाध्यक्ष फुटबल कपको उपाधि उचालेको छ ।आज भएको फाइनल खेलमा माथिल्लो मागुरमाडीलाई ३-२ को गोलअन्तरले हराउँदै धुलाबारीले उपाधि उचालेको हो ।
स्थानीय कवि शिरोमणी माविको खेल मैदानमा पहिलो हाफको ८ मिनेटमै १ गोलको अग्रता लिएको माथिल्लो मागुरमाडीले अग्रतालाई कायम राख्न नसक्दा हार व्येहोरेको हो ।
पहिलो हाफमा १ गोलले पछि परेको धुलाबारी बजार क्षेत्रले दोस्रो हाफमा भने उत्कृष्ट प्रदर्शन गर्दै ३ गोल गर्यो । खेलको ४२ औँ मिनेटमा लगातार २ गोल र ६० मिनेटमा थप १ गोल गर्दै धुलाबारी बजार क्षेत्र ३ गोल गर्न सफल बनेको हो । खेलको अन्त्यमा मागुरमाडीले १ गोल फर्काए पनि बिजेता बन्न भने सकेन । जसअन्तर्गत ३-२ को गोलअन्तरले धुलाबारी बजार क्षेत्रले उपाधि जितेको हो ।
उपाधिसगैँ धुलाबारीले नगद ४० हजार, ट्रफि, मेडल र प्रमाण पत्र प्राप्त गरेको छ भने मागुरमाडीले नगद २५ हजार, ट्रफि, मेडल र प्रमाण पत्रमा चित्त बुझाएको छ । विजेता टिमलाई मेचीनगरका नगर प्रमुख गाेपालचन्द्र बुढाथोकी, मेचीनगर-९ का वडा अध्यक्ष कन्चन तामाङ लगायतले पुरस्कार वितरण गरेका थिए । गत माघ २७ गतेबाट शुरु भएको प्रतियोगितामा ९ टिमको सहभागिता रहेको थियो ।
