मेचीनगर, ९ फागुन । झापाकाे मेचीनगर- ३ स्थित बडाखालमा जारी नकआउट फुटबल प्रतियोगिताको फाइनल खेल आज हुँदै छ । गत माघ २८ गतेबाट शुरु भएको प्रतियोगिताको फाइनल खेल आज हुन लागेको हो ।
फाइनलमा आयोजक समेत रहेको नवज्योति युवा क्लब र न्यू स्टार बुद्धशान्तिबिच प्रतिस्पर्धा हुँदै छ । यी दुवै टोली सेमी फाइनलमा आकर्षक जित निकाल्दै फाइनलमा आइपुगेका हुन् । पहिलो सेमी फाइनल खेलमा न्यू स्टार, खोपवाडीलाई हराउँदै बुद्धशान्तिले फाइनलमा स्थान बनाएको हो भने दोस्रो सेमीमा ब्रदर्श युनाइटेड चन्द्रगढीलाई पराजित गर्दै आयोजकले फाइनलमा बुद्धशान्तिसगँको भेट पक्का गरेको हो ।
स्थानीय नवज्योति आधारभुत विद्यालयको खेल मैदानमा दिउँसो २ बजेबाट फाइनल शुरु हुने आयोजकले जानकारी दिएको छ । आजको फाइनल खेलमा प्रदेश नं १ का प्रदेश सभा सदस्य गोपाल तामाङको प्रमुख आतिथ्यता रहने पनि आयोजकले जनाएको छ ।
विजेता र उपविजेता टिमले प्राप्त गर्ने ट्रफी आयोजकले यस अघि नै सार्वजनिक गरिसकेको छ । प्रतियोगिताको विजेता टोलीले नगद ८१ हजार र उपविजेता टोलीले ५१ हजार सहित ट्रफी, मेडल र प्रमाण पत्र प्राप्त गर्ने छन् ।