रातोपोस्ट संवाददाता
एजेन्सी । अफ्रिकी मुलुक मालीमा दुईओटा हेलिकोप्टर एकापसमा ठोक्किँदा १३ जना फ्रान्सेली सैनिकको मृत्यु भएको छ ।
जिहादीविरुद्धको कारबाहीका क्रममा हेलिकोप्टर दुर्घटना भएको फ्रान्सको राष्ट्रपति कार्यालयले जनाएको छ । फ्रान्सका राष्ट्रपति इम्यानुअल म्याक्रोनले गहिरो शोक व्यक्त गरेका छन् ।
घटनाबारे अनुसन्धान सुरु भएको छ । स्थानीय समयअनुसार सोमबार राति सो दुर्घटना भएको हो । मालीको उत्तरी क्षेत्रमा सन् २०१३ मा इस्लामिक लडाकूले कब्जा गरेपछि फ्रान्सले उक्त क्षेत्रमा हजारौँ तैनाथ गरेको छ ।
त्यस क्षेत्रका अधिकांश भाग सेनाको नियन्त्रणमा छ भएपनि असुरक्षाको वातावरण भने जारी छ र यस क्षेत्रसँग नजिकको अन्य देशहरुमा पनि हिंसा फैलिएको छ । माली, माउरीटानिया, नाइजर, बुर्किना फासो र चाडमा स्लामिक लडाकू विरुद्धको लडाईमा सघाउनका लागि फ्रान्सका ४५ सय सैनिक तैनाथ छन् ।