काठमाडौं । संघीय संसद अन्तर्गतको प्रतिनिधि सभाका उम्मेदवार तथा सत्तारुढ नेकपाका सांसद अग्निप्रसाद सापकोटालाई तत्काल पक्राउको माग गर्दै सर्वाेच्च अदालतमा रिट दायर भएको छ ।
व्यक्ति हत्या आरोपी सापकोटालाई सभामुख बनाउन लागेको भन्दै नेकपाको चर्काे आलोचना भइरहेका बेला उनलाई पक्राउ गरेर अनुसन्धान अघि बढाउन माग गर्दै शुक्रबार सर्वाेच्चमा रिट दायर भएको हो ।
वरिष्ठ अधिवक्ता दिनेश त्रिपाठीले दायर गरेको रिटमा सापकोटालाई तत्काल पक्राउ गरी उनीमाथि अनुसन्धान थाल्न माग गरिएको छ ।
माओवादी युद्धकालमा काभ्रेका अर्जुन लामाको अपहरणपछि हत्या गरेको अभियोगमा सापकोटाविरुद्ध परेका मुद्दा सर्वोच्च अदालतमा विचाराधीन छ ।
व्यक्ति हत्या आरोपीलाई सभामुख बनाउन लागेको भन्दै नेकपा र सरकारको कडा आलोचना भइरहेका बेला उनीविरुद्ध रिट परेको हो ।
सभामुखमा उनको एकल उम्मेदवार परेकाले उनी निर्विरोध निर्वाचित भएका छन् । तर, औपचारिक रुपमा घोषणा हुन बाँकी रहेको छ ।
आइतबार बस्ने प्रतिनिधि सभाको बैठकमा जेष्ठ सदस्यका हैसियतले बैठक सञ्चालन गर्ने महन्थ ठाकुरले सापकोटा सभामुखमा निर्विरोध निर्वाचित भएको घोषणा गर्नेछन् । तर, यसअघि शुक्रबार नै उनीविरुद्ध सर्वाेच्चमा पक्राउ गरेर अनुसन्धान गर्न माग गर्दै रिट परेको हो ।