रातोपोस्ट संवाददाता
झापा, ३० बैशाख । झापामा करिब ६५ प्रतिशत मत खसेको छ । जिल्ला निर्वाचन कार्यालय झापाका अनुसार भारतसँगको सीमावर्ती जिल्लामा शान्तिपूर्ण रूपमा मतदान सम्पन्न भएको छ ।
सहायक निर्वाचन अधिकृत गणेश पाण्डेले झापा गाउँपालिकाका ७ केन्द्र, कचनकवलका १ र भद्रपुर नगरका २ केन्द्रमा मतदान जारी रहको जनाए । ‘यी केन्द्रमा पनि केही समयमा मतदान सकिँदैछ’, उनले भने ।
उनका अनुसार झापामा कुनै कारणले ५ मिनेट पनि मतदान स्थगन गर्नु परेन । कार्यालयले मतगणना पनि आज रातिबाट सुरु हुने जनाएको छ । सबै मतपेटिका संकलनपछि सर्वदलीय बैठक राखेर मुचुल्का गरेपछि राति १० बजेपछि गणना सुरु गरिने पाण्डेले जनाए ।