रातोपोस्ट संवाददाता
काठमाडौँ, १ जेठ । काठमाडौँ महानगरपालिकामा स्वतन्त्र उम्मेदवारको अग्रता कायमै छ । आज अपराह्न सार्वजनिक मतपरिणामअनुसार स्वतन्त्र उम्मेदवार बालेन्द्र साहले दुई हजार ८२० मत प्राप्त गरेका छन् ।
नेकपा (एमाले)का केशव स्थापितले एक हजार ५०७ र नेपाली कांग्रेसका सिर्जना सिंहले एक हजार ४४९ मत प्राप्त गरेको निर्वाचन अधिकृतको कार्यालयले जनाएको छ । यस्तै स्वतन्त्र उम्मेदवार सुमन सायमीले २४४ र राष्ट्रिय प्रजातन्त्र पार्टीका मदनदास श्रेष्ठले २३३ मत प्राप्त गरेका छन् ।
कामपा वडा नं १, २, ३, ४ र ३२ को मतगणना भइरहेको छ । मतगणनामा ढिलाइ कारण आलोचना हुन थालेपछि निर्वाचन कार्यालयले गणना केन्द्र थप गरेको छ । कार्यालयले एक केन्द्र थप गरी विभिन्न छ स्थानबाट मतगणना गर्न थालेको छ ।
