काठमाडौँ, २५ असार । श्रीलंकामा जारी आर्थिक संकटको बीचमा जनताको आक्रोश अझै शान्त भएको छैन । देशैभर तेल र अन्य अत्यावश्यक वस्तुको अभाव हुँदा जनता फेरी सडकमा उत्रिएका छन् । शनिबार राष्ट्रपति गोटाबाया राजापाक्षेको राजीनामा माग गर्दै प्रदर्शनकारीको भीडले उनको निवास घेराबन्दी गरेको छ ।
समाचार एजेन्सी एएफपीका अनुसार यी प्रदर्शनकारीहरूले राष्ट्रपतिको घरमा प्रवेश गर्ने प्रयास गरेपछि राजापाक्षे आफ्नो निवासबाट भागेका थिए ।केही प्रदर्शनकारी राष्ट्रपति निवासमा प्रवेश गरेको बताइएको छ । त्यसपछि सुरक्षाकर्मीले राष्ट्रपतिलाई घरबाट निकालेर सुरक्षित स्थानमा पुर्याएका थिए । श्रीलंकाको एक टिभी च्यानल सिरसा टिभीले सार्वजनिक गरेको फुटेजमा राष्ट्रपति निवासमा भीड प्रवेश गरेको देख्न सकिन्छ । तर, सुरक्षाकर्मीले पानीको फोहोरा र अश्रुग्यास प्रहार गरी भीडलाई तितरबितर पार्ने प्रयास गरेका थिए । प्रदर्शनका क्रममा ३० जनाभन्दा बढी घाइते भएका छन् ।
श्रीलंका विगत केही महिनादेखि आर्थिक संकटसँग जुधिरहेको छ । देशभर खाद्यान्नदेखि इन्धनको अभाव भएको छ । घरमा बिजुली पनि केही घण्टा मात्र पुग्छ । श्रीलंकाको विदेशी मुद्रा सञ्चिति निरन्तर घट्दै गएका कारण चिकित्सा सम्बन्धी अत्यावश्यक वस्तुसमेत आयात गर्न सकेको छैन ।
प्रधानमन्त्रीले बोलाए आकस्मिक बैठक
यसैबीच, प्रधानमन्त्री रनिल विक्रमासिङ्घेले समसामयिक अवस्थाबारे छलफल गरी तत्काल समाधान खोज्न पार्टी नेताहरूको सहभागितामा आकस्मिक बैठक बोलाएका छन् । श्रीलंकाको डेली मिररले प्रधानमन्त्रीको मिडिया डिभिजनलाई उद्धृत गर्दै समाचार छापेको छ ।