झापा, १७ बैशाख । झापामा स्कुटरलाई मोटरसाइकलले ठक्कर दिँदा एक जनाको मृत्यु भएको छ । दुर्घटनामा परी एक जना घाइते भएका छन् । दमक नगरपालिका– ९ स्थित बरगाछीमा शनिवार राती साढे ९ बजेको समयमा पूर्वबाट पश्चिम तर्फ जाँदै गरेको प्र–१–०१–०१५ प ४२५१ नम्बरको स्कुटरलाई सोही दिशातर्फ ज्यादै गरेको प्र–१–०२–०४३ प ८५२३ नम्बरको मोटरसाइकलले पछाडिबाट ठक्कर दिएको थियो ।

दुर्घटनामा परी मोटरसाइकल चालक उर्लाबारी नगरपालिका– ३ निवासी ३० वर्षीय विवेक धिमाल र स्कुटर चालक सोही ठाउँका ३४ वर्षीय सोबित तामाङ घाइते भएका थिए । घाइते मध्ये मोटरसाइकल चालक धिमालको निम्स अस्पताल दमकमा उपचारको क्रममा मृत्यु भएको जिल्ला प्रहरी कार्यालय झापाले जनाएको छ । स्कुटर चालक तामाङको उपचार भइरहेको छ । यता इलाका प्रहरी कार्यालय दमकले दुवै सवारीसाधन नियन्त्रणमा लिएको जनाइएको छ ।