झापा, असोज ५ । मेचीनगर नगरपालिकाका प्रमुख प्रशासकीय अधिकृत महेश पराजुलीको सरुवा भएको छ । संघीय मामिला तथा सामान्य प्रशासन मन्त्रालयको बिहिबारकाे निर्णय अनुसार पराजुलीको मन्त्रालयमा नै सरुवा भएको हाे भने मेचीनगरमा टेकप्रसाद रेग्मी प्रमुख प्रशासकीय अधिकृतका रुपमा आउने भएका छन् ।
हाल झापाकै भद्रपुर नगरपालिकाको प्रमुख प्रशासकीय अधिकृतको रुपमा कार्यरत रेग्मीलाई मन्त्रालयले मेचीनगरमा सरुवा गरेको हो । २०७९ चैत २६ गते मेचीनगरको प्रमुख प्रशासकीय अधिकृतका रुपमा आएका पराजुलीको पाँच महिनामा नै सरुवा भएको हो ।
मेचीनगरमा पछिल्लो एक बर्षमा चार जना प्रमुख प्रशासकीय अधिकृत परिवर्तन भएका छन । २०७९ असोजसम्म सुरेश दाहाल, त्यसपछि २०७९ फागुनसम्म राजकपुर चौलागाई, २०८० असोज ४ सम्म महेश पराजुलीले नगरको प्रमुख प्रशासकीय अधिकृतको जिम्मेवारी सम्हालेका थिए भने अब टेकप्रसाद रेग्मीले जिम्मेवारी सम्हाल्नेछन् ।