रातोपोस्ट संवाददाता
झापा, १५ जेठ । झापाको शिवसताक्षीमा पिकअप भेनको ठक्करबाट एक पैदलयात्रीको मृत्यु भएको छ । मृत्यु हुनेमा शिवसताक्षी नगरपालिका बस्ने अन्दाजी ६० वर्षीय पुत्रथाम राई रहेको जिल्ला प्रहरी कार्यालय झापाले जनाएको छ ।
प्रहरीका अनुसार आइतबार राति साढे ८ बजेको समयमा पूर्वपश्चिम राजमार्गअन्तर्गत शिवसताक्षी–९ स्थित मिलनचोकमा पूर्वबाट पश्चिमतर्फ जाँदै गरेको प्रदेश ३–०१–०२७ च ११२१ नम्बरको पिकअप भेनले पैदलयात्री राईलाई ठक्कर दिएको थियो ।
टाउको तथा शरीरको विभिन्न भागमा चोट लागेर घाइते भएका राईलाई इलाका प्रहरी कार्यालय झिलझिलेले उद्धार गरी बिएन्डसी हस्पिटल बिर्तामोड पुर्याएका थिए । उनको सोही हस्पिटलमा उपचारको क्रममा मृत्यु भएको प्रहरीले जनाएको छ । ठक्कर दिने सवारी तथा चालक शिवसताक्षी–९ बस्ने २८ वर्षीय अङ्कित चौधरीलाई प्रहरीले नियन्त्रणमा लिएको छ ।