मेचीनगर, १६ माघ । मेचीनगर–६ स्थित तुर्केनी खेल मैदानमा आइतबारदेखि जिल्लास्तरीय टी–१० क्रिकेट प्रतियोगिता आयोजना हुने भएको छ । स्थानीय जुझारु युवाहरु समाहित क्लब केभिटी युथले उक्त प्रतियोगिता आयोजना गर्न लागेको बुधबार पत्रकार सम्मेलनमार्फत जानकारी गराइएको हो ।
प्रतियोगिता माघ २० गते (आइतबार) देखि २७ गतेसम्म सञ्चालन हुनेछ भने प्रतियोगिताको मुख्य प्रायोजकमा अशोक मसाले रहेको छ । प्रतियोगिता अन्तर्गतको खेल संयोजक एवम् नेपाल क्रिकेट संघ झापा सदस्य वरदान खड्काका अनुसार प्रतियोगितामा १२ वटा टिमले सहभागिता जनाउने छन् भने अन्य टिमसँग पनि छलफल भइरहेकाले सहभागी टिमको संख्या बढ्न पनि सक्छ । यसैगरी, मेचीनगरका ४ वटा विद्यालयका छात्राहरूले समेत प्रतियोगितामा सहभागिता जनाउने उनले जनाए ।
प्रतियोगिताको विजेताले नगद ५० हजार तथा उपविजेताले नगद ३० हजारसहित मेडल, टफ्री र प्रमाणपत्र प्राप्त गर्नेछन् । प्रतियोगिता अन्तर्गत उद्घाटनको पहिलो खेल पुरूषतर्फ बाहुनडाँगी र १६ नम्बर युवा क्लब तथा महिलातर्फ एमिटी पब्लिक स्कुल र गंगा मेमोरियल स्कुलबीच हुने जनाइएको छ । त्यस्तै, प्रतियोगिताभरकै उत्कृष्ट खेलाडीलाई ‘प्लेयर अफ द सिरिजको अवार्ड प्रदान गरिनेछ जसको राशी नगद ५ हजारसहित प्रमाणपत्र रहेको छ । यसैगरी उत्कृष्ट व्याट्स म्यान र वेष्ट बलरलाई जनही २५÷२५ सय र दैनिक खेलका म्यान अफ द म्याचलाई ५ सय प्रदान गरिने आयोजकले जनाएको छ ।
प्रतियोगिता सम्पन्न गर्न करिव ३ लाख २१ हजार ५ सय रूपैयाँ खर्च लाग्ने खेल संयोजक खड्काले बताए । ‘पछिल्लो समय नेपालमा क्रिकेटको क्रेज बढिरहेको छ’, खेल संयोजक खड्काले भने, ‘अन्य खेलकुदका गतिविधि भन्दा क्रिकेट प्रतियोगिता उचित हुने ठानेर आयोजना गर्न लागिएको हो । महिला खेलाडीको हबका रुपमा परिचित काँकरभिट्टाबाट दिनप्रतिदिन महिला खेलाडी विदशिने क्रम पनि बढेको छ । त्यसलाई मध्यनजर गर्दै महिला खेलाडीहरुलाई पनि समेटेका हौं ।’
पत्रकार सम्मेलन कार्यक्रमका प्रमुख अतिथि मेची उद्योग वाणिज्य संघका कार्यसमिति सदस्य एवम् युवा व्यवसायी सन्तोष खवासले क्रिकेट खेलले मनोरञ्जन मात्र नदिएर समाज र देशको नाम राख्न मद्धत हुने बताए । कार्यक्रममा विशेष अतिथिकाे रुपमा युवा व्यवसायी रामबहादुर तामाङ, सञ्चारकर्मी शिशिर चौलागाइँलगायतकाे आतिथ्यता रहेकाे थियाे । केभिटी युथ क्लबका अध्यक्ष सुजित कार्कीको अध्यक्षतामा सम्पन्न पत्रकार सम्मेलनको सञ्चालन सचिव संगम बरालले गरेका थिए ।