झापा, १८ वैशाख । नेकपा एमालेका केन्द्रीय सदस्य रविन कोइरालाले मेचीनगरको मुहार फेर्न पनि पुरानो विरासत फर्काउन जरुरी रहेको बताएका छन् । आइतबार मेचीनगरकाे काँकरभिट्टामा नेपाल ट्रेड युनियन महासंघ (जिफन्ट) मेचीनगरले आयोजना गरेको १३३ औँ अन्तराष्ट्रिय मजदुर दिवसको अवसरमा कोइरालाले यस्तो कुरा बताएका हुन् ।
२०५४ सालमा स्थापना भएको मेचीनगर नगरपालिकामा पहिलो मेयरका रुपमा उनै कोइराला थिए । नेता कोइराला नगरप्रमुखका रुपमा एमालेबाट निर्वाचित भएका थिए । १५ वर्षसम्म नगरपालिकामा जनप्रतिनिधि थिएनन् । नगरपालिका कर्मचारीको भरमा १५ वर्ष चल्यो । २०७४ सालको स्थानीय तहको चुनावमा नेपाली कांग्रेसबाट मेयरमा विमल आचार्य निर्वाचित भएका थिए । उपमेयर मिना पोखरेल उप्रेतीसहित बहुमत सदस्य एमालेबाट निर्वाचित भएका थिए ।
एमाले झापाका सहइन्चार्ज समेत रहेका नेता कोइरालाले त्यो पुरोना विरासत फर्काउन पनि यसपटक एमालेबाट सक्क्षम र इमानदार नेतालाई जिताउन जनता लाग्नु पर्नेमा जोड दिएका थिए । उनले मजदुरको हितमा काम गर्न राज्यका सबै अंगहरुको आँखा खुलोस् भन्ने शुभकामना व्यक्त गरेका थिए । कार्यक्रममा एमालेबाट मेयरका उम्मेद्वार गोपाचन्द् बुढाथोकीले राज्यले मजदुरलाई गर्ने विभेद अन्त्य गर्नु पर्ने बताए । उपमेयरकी उम्मेद्वार मिना उप्रेतीले नगरमा अलपत्र रहेका अधुरा कामहरु पुरा गर्न बाँकी रहेको बताएकी छन् ।
कार्यक्रममा एमाले केन्द्रीय सल्लाहकार सदस्यद्वय विष्णु प्रसाई, भीम खवास, प्रदेश सभा सदस्य श्रीप्रसाद मैनाली, क्षेत्र नम्बर १ का कार्यबहाक अध्यक्ष टिकाराम मंग्राती, नगर अध्यक्ष राजु पोखरेल, ६ नम्बर वडाका वडाध्यक्षका उम्मेद्वार बालकृष्ण थापा, मजदुर नेताहरु भरत राई, एकराज तिम्सिना, खडानन्द भण्डारी लगायतको उपस्थिती रहेको थियो । जिफन्टका नगर अध्यक्ष राजकुमार सुवेदीको अध्यक्षता र सचिव गणेश चौहानको सञ्चालनमा कार्यक्रम सम्पन्न भएको थियो ।