झापा, २१ असार । अपाङ्गता भएका व्यक्तिहरूलाई घर-घरमा पुगेर सेवा दिने उदेश्यले मेचीनगरमा आगामी साउन १ गतेदेखि अपाङ्गता रोकथाम तथा पुनःस्थापना कार्यक्रम सुरू हुने भएको छ । विहीबार मेचीनगर नगरपालिकामा आयोजित एक कार्यक्रममा नगरपालिका, कोशी प्रदेश सामाजिक विकास मन्त्रालय र करूणा फाउन्डेशनको तर्फबाट साे कार्यक्रम अघि बढाउने त्रिपक्षीय सम्झौता भएको हाे ।
नगरपालिकाकी महिला तथा बालबालिका विकास शाखा प्रमुख जयन्ती खरेलले मेचीनगरमा अपङ्गता भएका व्यक्तिहरूलाई घर-घरमा पुगेर उनीहरूलाई सेवा सुविधा उपलब्ध गराउने जानकारी दिइन् । बैशाखी, ह्वीलचियर, स्वास्थ्य बीमा लगायतका सेवा प्रदान गराउने उनकाे भनाई छ । १० वर्षमुनिका अपाङ्गता भएका बालबालिकाहरूलाई शिक्षा लगायतका अत्यावश्यक सेवा उपलब्ध हुने खरेलले बताइन् । आगामी साउन १ गतेदेखि २०८४ साल असार ३२ गतेसम्म साे कार्यक्रमका लागि एक कराेड २० लाख बढीको सम्झाैता भएको छ ।
प्रदेश र नगरपालिकाकाे करिव ९४ लाख र बाँकी रकम करूणा फाउणन्डेशनले गर्ने सम्झाैता छ । त्रिपक्षीय संयुक्त साझेदारी कार्यक्रममा राष्ट्रिय अपाङ्ग महासंघ नेपालको प्राविधिक सहयोग रहनेछ । कार्यक्रममा मेचीनगर नगरपालिका मेयर गोपालचन्द्र बुढाथोकी, उपमेयर मीना पोखरेल उप्रेती, प्रमुख प्रशासकीय अधिकृत अग्निप्रसाद अधिकारी, शिक्षा शाखा प्रमुख होमनाथ भण्डारी, सामाजिक विकास शाखा प्रमुख एवम् बरिस्ठ प्रशासकीय अधिकृत अनन्तप्रकाश वस्ती, करूणा फाउन्डेस नेपालका निर्देशक योगेन्द्र गिरी, कार्यकारी निर्देशक दिपक सापकोटा लगायतको सहभागिता रहेको थियो ।