झापा, ६ फागुन । सिटिजन लाइफ इन्स्योरेन्स कम्पनी बिर्तामोड शाखाले एकजना पत्रकारसहित तीन जनालाई सम्मान गरेको छ । बिर्तामोड शाखाले कम्पनी स्थापनाको चौथो वार्षिकोत्सवको अवसर पारेर बिर्तामोडस्थित कार्यालयमै शुक्रबार एक संक्षिप्त कार्यक्रमका बिच एभिन्यूज टेलिभिजनका झापा सम्वाददाता एंवम साझा अनलाइन खबरका सम्पादक सन्तोष न्यौपानेलाई सम्मान गरिएको हो ।
नेपाल बिमा क्षेत्रको प्रवर्द्धन र विकास एवंम नेपाली समाज रूपान्तरणमा उल्लेखनीय योगदान पु¥याएको ठहर गर्दै न्यौपानेलाई सम्मान गरिएको कम्पनीले जनाएको छ । साथै अन्वेषककर्ता तथा अभियानकर्मी सन्तोष घिमिरे तथा समाजसेवी गोमा अधिकारी खतिवडालाई पनि सम्मान गरेको छ । कम्पनीका प्रदेश नम्बर १ का प्रमुख व्यवसाय अधिकृत विमलकुमार वाग्ले, एरिया ब्रान्च मेनेजर उत्तम कोइराला लगायतले उनीहरूलाई दोसल्ला र ढाका टोपी पहिराएर सम्मान पत्र प्रदान गरेका थिए ।
ब्रान्च मेनेजर उत्तम कोइरालाले संस्थाको वार्षिक गतिविधि तथा प्रगति प्रस्तुत गरेको कार्यक्रममा कार्यक्रमका प्रमुख अतिथि वाग्ले, सम्मानित व्यक्ति न्यौपाने तथा घिमिरे सिनियर एजेन्सी म्यानेजर ईश्वरीप्रसाद बराल लगायतले शुभकामना मन्तव्य राखेका थिए । कार्यक्रममा प्रमुख अतिथि वाग्ले तथा ब्रान्च मेनेजर कोइरालाले सर्वसाधारणको जीवन निर्वाह र विपद्मा जीवन बिमाले उल्लेख्य सहयोग पुर्याइरहेको उल्लेख गर्दै सिटिजनले छोटो समयमै वीमितहरुको विश्वास जितेको उल्लेख गरेका थिए ।
कम्पनीकी शाखा प्रमुख जमुना कटुवालले सञ्चालन गरेको कार्यक्रमका बिच सहभागीहरूलाई केक काटेर खुवाई वार्षिकोत्सव मनाइएको थियो । साबिक मेची अञ्चलका पाँचथर, इलाम, झापा कार्यक्षेत्र रहेको बिर्तामोड शाखाले चार वर्षको छोटो अवधिमै ३५ सय हाराहारी ग्राहक (वीमित) बनाइसकेको एरिया म्यानेजर कोइरालाले जानकारी दिए ।