झापा। कोरोना रोकथाम तथा अनुगमन जिल्ला समन्वय समिति झापाको आयोजनामा दुई दिनअघिको सर्वपक्षीय बैठकले मेचीपारि अलपत्र नेपालीलाई ल्याउने निर्णय गरेको थियो ।
वैठकले अलपत्र सबैलाई सोमबार ल्याएर जिल्लाका विभिन्न क्वारेन्टाइनमा राख्ने निर्णय गरे पनि झापा प्रहरीले भने अलपत्रलाई ल्याउनका लागि ‘माथिको आदेश’ नआएको जनाएको छ ।
झापाका प्रहरी प्रमुख एसपी कृष्णप्रसाद कोइरालाले माथिको आदेश नआएसम्म भारतबाट नेपाली ल्याउन नसकिने दाबी गरे । कोइरालाले भने,‘बैठक ल्याउने निर्णय गरेको हुन सक्छ तर गृह मन्त्रालयवाट आधिकारित निर्देशन नआएसम्म ल्याउन सकिन्न ।’ उनले अलपत्रलाई ल्याएर राख्ने क्वारेन्टाइनसमेत तयारी भइनसकेको बताए । ‘उनीहरुलाई ल्याएर कहाँ राख्ने के ख्वाउने ?,’ उनले भने ।
सर्वपक्षीय बैठकमा प्रदेश सरकारका कानुन मन्त्री हिक्मत कार्कीले नेपाल र भारतबीचको सहमतिअनुसार नेपालमा भएका भारतीयलाई पारि र भारतमा भएका नेपालीलाई वारि ल्याउने औपचारिक निर्णय हुन बाँकी रहेको जनाएका थिए । भारतबाट आएकाहरुलाई होल्डिङमा राख्ने, क्वारेन्टाइनमा राख्ने या सम्बन्धित जिल्ला पठाउने कुरामा प्रदेश सरकार जिम्मेवार रहेको जनाए ।
भारतबाट करिब २० हजार नेपाली प्रदेशको विभिन्न नाकाबाट नेपाल प्रवेश गर्ने अवस्थामा रहेको मन्त्री कार्कीले जनाए । मेचीपारि हाल हजारभन्दा बढी नेपाली अलपत्र अवस्थामा रहेको जानकारी आएको छ। कतिपय भने रातिको समयमा अवैध ढंगबाट नेपाल प्रवेश गरिरहेको स्थानीयवासीहरुको भनाईछ । कान्तिपुर