झापा। झापामा कोरोना भाइरसको संक्रमण तिब्र देखिन थालेपछि जिल्लामा क्रियाशील पत्रकारहरुको पीसीआर परिक्षणका लागि स्वाब संकलन सुरु भएको छ । आज (बुधवार) झापाको विर्तामोडमा प्रदेश जनसंस्थ्य प्रयोगशाखा विराटनगरको प्राविधिक टोलीले स्वाब संकलन गरेको हो ।
महासंघको पहलमा सामाजिक विकास मन्त्रालयले पत्रकारहरुको स्वाब संकलन गरेको नेपाल पत्रकार महासंघ झापाका अध्यक्ष तारामणि सापकोटाले बताए ।
समाचार रिपोर्टिङका क्रममा पत्रकार अग्रपङ्तिमा रहने भएकाले महासंघ झापाले पहिलो चरणमा २५ जना पत्रकारको स्वाब परीक्षणको व्यवस्था मिलाएको हो । यसअघि मोरङमा १७ जना पत्रकारको परीक्षण गरिएको थियो ।
झापामा फ्रन्ट लाइनमा काम गर्ने अरु धेरै पत्रकारको परीक्षण छुटेकाले एक साताभित्र थप परीक्षणको व्यवस्था मिलाइने महासङ्घका सचिव सन्तोष आचार्यले जानकारी दिए ।
स्वाब संकलनस्थलमा आइपुगेका प्रदेशका सामाजिक विकास मन्त्री जीवन घिमिरेले कोरोनाविरुद्धको अभियानमा सञ्चार क्षेत्रको भूमिका महत्वपूर्ण रहेको भन्दै सकेसम्म सुरक्षित रहेर समाचार संकलन गर्नु पर्नेमा जोड दिए । पत्रकारहरुको स्वाबको रिपोर्ट विहीवार अपरान्हसम्म आइपुग्ने जनाइएको छ ।