झापा, ३१ असाेज । झापामा दुईवटा मोटरसाइकल एकआपससँग ठोक्किदा दुई जनाको मृत्यु भएको छ। दुर्घटनामा परी नाबालिकासहित दुई जना घाइते भएका छन्।
मृत्यु हुनेमा बाह्रदशी गाउँपालिका-२ निवासी २५ वर्षीय अनिश साउदेन र सोही गाउँपालिका-६ निवासी ४३ वर्षीय भोलाराज भुजेल रहेको जिल्ला प्रहरी कार्यालय झापाका डीएसपी वसन्त पाठकले जानकारी दिए।
प्रहरीका अनुसार चारपाने बेलडाँगीस्थित भित्री सडकखण्डमा सोमबार अपरान्ह ४.४५ बजेतिर दक्षिणबाट उत्तरतर्फ जाँदै गरेको मे५प १६०४ नम्बरको मोटरसाइकल र विपरीत दिशाबाट आउँदै गरेको मे३प ५५८० नम्बरको मोटरसाइकल एकआपसमा ठोक्किएको थियो।
दुर्घटनामा परी मे५प १६०४ नम्बरको मोटरसाइकलका चालक साउदेन र मे३प ५५८० नम्बरको मोटरसाइकलका चालक भुजेलको बिर्तामोडस्थित बिएण्डसी हस्पिटलमा उपचारका क्रममा मृत्यु भएको डीएसपी पाठकले बताए।
दुर्घटनामा मे३प ५५८० नम्बरको मोटरसाइकलमा सवार मृतक भुजेलकी श्रीमती ४२ वर्षीया चन्द्रकला भुजेल र उनकी छोरी ९ वर्षीया प्रसन्ना भुजेल घाइते भएका छन्। उनीहरूको सोही अस्पतालमा उपचार भइरहेको प्रहरीले जनाएको छ।