झापा, १२ पुस । झापाकाे काँकरभिट्टा बहुमुखी क्याम्पसको २४ औं वार्षिकोत्सवको अवसरमा आयोजित अन्तर मा.वि तथा कलेज फूटबल प्रतियोगिता साेमबारबाट सुरु भएको छ । काँकरभिट्टा मा.विको खेल मैदानमा आयोजित खेलको समुद्घाटन मेचीनगर नगरपालिका वडा नम्बर ६ का अध्यक्ष ललितबहादुर तामाङ्गले गरेका थिए। साेमबार भएको खेलहरुमा आयोजक काँकरभिट्टा बहुमुखी क्याम्पसले हिमालय मल्टिपल क्याम्पस धुलाबारीलाई ३–१ गोल अन्तरले हराउँदै सेमी फाइनल प्रवेश गरेको छ । काँकरभिट्टा बहुमुखी क्याम्पसका लागि नविन सुवेदीले खेलको २१ औं मिनेट र ६८ औं मिनेटमा दुई गोल गर्न सफल भए भने अर्का खेलाडी राज क्षेत्रीले खेलको ६३ औं मिनेटमा १ गोल गर्न सफल भएका थिए । त्यस्तै, हिमालयन मल्टिपल क्याम्पसका लागि अर्पण लेप्चाले खेलको ५८ औं मिनेटमा सान्तवना गोल फर्काएका थिए ।त्यस्तै साेमबार भएको दोस्रो खेलमा होलीबेल अंग्रेजी मा.वि. धुलाबारीले सूर्योदय मा.वि काँकरभिट्टालाई १–० गोल अन्तरले पाखा लगाएको थियो । होलीेबेलका लागि पुजन लिम्बुले खेलको १० औं मिनटमा गोल गर्न सफल भएका थिए ।
त्यसैगरी तेस्रो खेलमा काँकरभिट्टा मा.विले पशुपति मा.वि. काँकरभिट्टालाई २–० गोल अन्तरले पाखा लगाउँदै सेमीफाइनलमा प्रवेश गरेको छ । काँकरभिट्टा मा.वि.का लागि मनिष श्रेष्ठले खेलको २० औं मिनेटमा र गोविन खतिवडाले खेलको ३४ औं मिनेटमा गोल गर्न सफल भएका थिए । साेमबार चौंथो खेलमा धुलाबारी मा.वि. धुलाबारीले इष्ट होराइजन मा.वि. धुलाबारीलाई ३–० गोल अन्तरले हराउँदै सेमीफाइनलमा प्रवेश गरेको छ । धुलाबारी मा.विका लागि मानव पौंडेल, आदित्य ढुङ्गेल र निरज कार्कीले १/१ गोल गर्न सफल भएका थिए ।
आज नै भएको भएको अन्तिम क्वार्टर फाइनल खेलमा होलीबेल मा.वि. धुलाबारीले अरुणोदय आ.मा.वि. काँकरभिट्टालाई ट्राइब्रेकरमा ३–२ गोल अन्तरले हराउँदै सेमी फाइनलमा प्रवेश गरेको छ । मंगलबार हुने पहिलो सेमीफाइनल खेल काँकरभिट्टा बहुमुखी क्याम्पस र होलीबेल मा.वि. धुलबारी बीचमा हुनेछ भने दोस्रो सेमीफाइनल काँकरभिट्टा मा.वि. र धुलाबारी मा.वि. बीच हुने खेल संयोजक शेरबहादुर वस्नेतले जानकारी दिए ।
काँकरभिट्टा बहुमुखी क्याम्पसको २४ औं वार्षिकोत्वसको अवसरमा विभिन्न अतिरिक्त क्रियाकलापहरु सञ्चालन भइरहेको छ । जसमा अन्तर मा.वि. फूटबल, अन्तर मा.वि. नृत्य प्रतियोगिताका साथै आन्तरिक फूटबल, भलिबल, क्रिकेट, चेस, कविता तथा वकृत्वकला प्रतियोगिता सञ्चालन भइरहेको काँकरभिट्टा बहुमुखी क्याम्पसका सहायक क्याम्पस प्रमुख वासुदेव कोइरालाले बताए ।
खेलको विजेताले नगदरु.१० हजार, ट्रफी, मेडल तथा प्रमाणपत्र प्राप्त गर्नेछन् भने उपविजेताले नगद रु.५ हजार, ट्रफी, मेडल तथा प्रमाणपत्र प्राप्त गर्नेछन् । पुरस्कार क्याम्पसको २४ औं वार्षिकोत्सव पौंष १४ गतेकाको कार्यक्रमा वितरण गरिने छ ।काँकरभिट्टा बहुमुखी क्याम्पसका शिक्षा संकाय प्रमुख हेमकुमार खड्काले स्वागत गरेकाे कार्यक्रममा क्याम्पस प्रमुख लक्ष्मीप्रसाद उप्रेतीले कार्यक्रमको औतित्य माथि प्रकाश पारेका थिए ।
काँकरभिट्टा बहुमुखी क्याम्पसका संचालक शुसिल आर्चाय, प्रमुख अतिथि वडा अध्यक्ष ललितबहादुर तामाङ्गले शुभकामना मन्तव्य व्यक्त गरेका थिए ।
काँकरभिट्टा बहुमुखी क्याम्पसका अतिरिक्त क्रियाकलाप विभागका संयोजक लम्बोदर पौंडेलको अध्यक्षतामा भएको कार्यक्रमको सञ्चालन काँकरभिट्टा बहुमुखी क्याम्पसका व्यवस्थापन संकाय प्रमुख दुर्गाबहादुर लुइटेलले गरेका थिए ।