झापा, २५ पुस । होटल व्यवसायी महासंघको केन्द्रीय सचिव र सदस्यलाई मेचीनगरले सम्मान गरेको छ । होटल व्यवसायी संघ मेचीनगरले भर्खरै निर्वाचित महासंघका केन्द्रीय सचिवमा निर्वाचित राजु अधिकारी र केन्द्रीय सदस्यमा निर्वाचित डम्बरकुमारी श्रेष्ठलाई सम्मान गरेका हुन् ।
सोमबार संघको कार्यालयमा एक कार्यक्रमको आयोजना गरेर दुवै जनालाई सम्मान गरेको होटल व्यवसायी संघ मेचीनगरका अध्यक्ष सुरेशकुमार श्रेष्ठ (गोपाल) ले जानकारी दिए ।
कार्यक्रमका प्रमुख अतिथि मेचीनगर–६ का वडाध्यक्ष ललितबहादुर तामाङ, संघका पदाधिकारी तथा कार्यसमितिका सदस्यहरुले केन्द्रीय सचिव अधिकारी र सदस्य श्रेष्ठलाई खादा र अविर लगाएर सम्मान गरेका थिए ।
महासंघको चितवनमा हालै सम्पन्न १०औँ साधारण सभा तथा चौँथो राष्ट्रिय महाधिवेशनले काँकरभिट्टाका होटल व्यवसायी राजु अधिकारी सचिवमा र संघकी कार्यसमिति सदस्य डम्बरकुमारी श्रेष्ठलाई केन्द्रीय सदस्यमा सर्वसम्मत चयन गरेको थियो ।