काठमाण्डौ, २७ असार । नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल प्रचण्डकी जीवनसंगिनी सीता दाहालको निधन भएको छ । उनको आज बिहान ८:३३ बजे असामयिक निधन भएको हो । थापाथलीस्थित नर्भिक अन्तर्राष्ट्रिय अस्पतालमा उपचारका क्रममा ६९ वर्षको उमेरमा दाहालको आज बिहान निधन भएको प्रधानमन्त्री दाहालका निजी चिकित्सक प्रा. डा. युवराज शर्माले जानकारी दिए ।
दाहाल पार्किन्सन रोगका कारण लामो समयदेखि अस्वस्थ थिइन् । उनलाई स्वास्थ्यमा समस्या देखिएपछि नर्भिक अस्पताल भर्ना गरिएको थियो । दाहाल माओवादी केन्द्रको सल्लाहकार समेत हुन् ।
उनको पार्थिव शरीर अन्तिम श्रद्धाञ्जलीका लागि ११ बजेदेखि १ बजेसम्म माओवादी केन्द्रकाे केन्द्रीय कार्यालय पेरिसडाँडा, कोटेश्वरमा राखिने छ । उनको २ बजे पशुपति आर्याघाटमा अन्तिम संस्कार गरिने प्रधानमन्त्री प्रचण्डको सचिवालयले जनाएको छ ।