काठमाडौं। पूर्व सभामुख कृष्णबहादुर महराविरुद्धको मुद्दामा आइतवार जिल्ला अदालत काठमाडौंमा अन्तिम सुनुवाइ चलिरहेको थियो ।
दुवै पक्षका वकिलहरूको बहस सकिएपछि पर्खाइ फैसलाको थियो । महरा पनि फैसला कुर्दै इजलाशबाहिर केही कानून व्यवसायी र पत्रकारहरूसँग अनौपचारिक कुराकानीमा व्यस्त थिए । ‘अब त छुट्ने बेला भयो होला नि !’ एक जनाले प्रसंग निकाले ।
हँसिलो मुद्रामा महराले जवाफ फर्काए– ‘नछुटे पनि के भयो र ? डिल्लीबजार कारागार ३ महिने घर भइसक्यो । आज ३ महिना १७ दिन भयो ।’
कालो ज्याकेट र ढाका टोपीमा उपस्थित भएका महराले अदालत परिसरमा खुलेर कुराकानी गरेका थिए ।
आइतवार महराको पक्षबाट वरिष्ठ अधिवक्ताहरू रमनकुमार श्रेष्ठ, लव मैनाली, शेरबहादुर केसी, डा. भीमार्जुन आचार्य र सविता भण्डारी बराल तथा अधिवक्ताहरू सुशील सापकोटा, मुरारी सापकोटा र डा. दीनमणि पोखरेलले बहस गरे ।
न्यायाधीश अम्बरराज पौडेलको इजलाशमा सुनुवाइ भएको महराको मुद्दामा बहस सकिएपनि आइतवार फैसला सुनाउन नभ्याउने भनेपछि महरालाई डिल्लीबजार कारागार फर्काइएको छ ।
संघीय संसद् सचिवालयमा कार्यरत महिला कर्मचारीमाथि यौन दुर्व्यवहार गरेको आरोपमा उनी गत असोज १९ गते बालुवाटारस्थित सभामुखको सरकारी निवासबाट पक्राउ परेका थिए ।
बलात्कार प्रयासजस्तो गम्भीर आरोप लागेपछि महराले असोज १४ गते सभामुख पदबाट राजीनामा दिएका थिए ।
महरा पक्राउ परेपछि काठमाडौं जिल्ला अदालतमा मुद्दा अघि बढेको थियो ।
मुद्दाको प्रारम्भिक सुनुवाइपछि न्यायाधीश सुदर्शनराज पाण्डेको एकल इजलासले महरालाई पुर्पक्षका लागि थुनामा पठाउन कात्तिक १८ गते आदेश दिएको थियो ।
महराविरुद्ध किटानी जाहेरी दिने महिलाले यसबीचमा बयान फेर्दै महरालाई रिहा गर्न अदालतमा लिखित निवेदन नै दिएकी थिइन् ।