काठमाडौं । भारतमा कोरोना भाइरस (कोभिड–१९) बाट मृत्यु हुनेको संख्या ७ सय २३ पुगेको छ । भारतको स्वास्थ्य मन्त्रालयको पछिल्लो तथ्यांक अनुसार अहिलेसम्म भारतमा २३ हजार चार सय ५६ जनामा कोरोना भाइरसको संक्रमण देखिइसकेको छ ।
कोरोना भाइरसको कारण दक्षिण एसियामा सबैभन्दा प्रभावित बनेको भारतको महाराष्ट्रमा सबैभन्दा धेरै दुई सय ८३ जना मानिसको यसको कारण मृत्यु भइसकेको छ । यो राज्यमा मात्र ६ हजार चार सयभन्दा धेरै संक्रमित छन् ।
त्यस्तै गुजरातमा अहिलेसम्म एक सय १२ जनाको यो भाइरसको कारण मृत्यु भइसकेको छ । मध्य प्रदेशमा ८३ र दिल्लीमा ५० जनाको मृत्यु भएको छ ।
उत्तर प्रदेशमा अहिलेसम्म एक हजार ६ सय चार जनामा कोरोना भाइरसको संक्रमण पुष्टि भएको छ भने २४ जनाको मृत्यु पनि भइसकेको छ ।
त्यस्तै बिहारमा एक सय ७६ जनामा भाइरसको संक्रमण पुष्टि भएको छ भने दुईजनाको मृत्यु भएको छ ।
भारतमा अहिलेसम्म चार हजार आठ सय १४ जना संक्रमित निको भएर घर फर्किसकेका छन् ।