झापा, ७ असार । झापाको भद्रपुरमा साइकल चोरको बिगबिगी बढेसँगै दुई जना पक्राउ परेका छन् । प्रहरीले उनीहरूको साथबाट चार थान चोरीको साइकल समेत बरामद गरेको छ । पक्राउ पर्नेहरूमा भद्रपुर- ९ स्थित देवकोटा चोक बस्ने ३९ वर्षीय उदय दाहाल र भद्रपुर- ८ बस्ने १९ वर्षीय पेन्टा भन्ने लालदेव महतो रहेको प्रहरी कार्यालय झापाले जनाएको छ ।
भद्रपुर नगर क्षेत्रमा विभिन्न स्थानमा पार्किङ गरी राखिएका साइकलहरू चोरी भइरहेको सूचनाको आधारमा साइकल चोरहरूमाथि निगरानी तथा पहिचान गर्दै जाँदा असार ३ गते दाहाललाई साइकल चोरी गरिरहेको अवस्थामा पक्राउ परेका थिए । उनलाई नियन्त्रणमा लिएर अनुसन्धान २ वटा गियरवाला साइकलसहित तीन वटा साइकल बरामद गरिएको छ ।
असार ६ गते महतोले भद्रपुर- ८ बस्ने सोमराज थापाको एउटा गियरवाला साइकल चोरी गरी बिक्री गर्ने उद्देश्यले भारत तर्फ लैजाँदै गर्दा वडा प्रहरी कार्यालय भद्रपुरको टोली नेपाल भारतको सीमा मेची पुलबाट उनलाई पक्राउ गरेको प्रहरीले जनाएको छ । चोरीका साइकलसहित पक्राउ परेका दुवै जनालाई आवश्यक कारबाहीका लागि जिल्ला प्रहरी कार्यालय झापामा राखिएको छ ।