झापा, ५ पुस । झापामा जंगली हात्तीको आक्रमणबाट एक जनाको मृत्यु भएको छ। मृत्यु हुनेमा कचनकवल गाउँपालिका-१ निवासी ३७ वर्षीय जगतबहादुर भुजेल रहेको जिल्ला प्रहरी कार्यालय झापाका डीएसपी वसन्त पाठकले जानकारी दिए।

कचनकवल गाउँपालिका-१ स्थित चारकोशे जलथल जंगलसँगै जोडिएको पश्चिम देउराली सामुदायिक वनबाट निस्किएको हात्तीले भुजेललाई मंगलबार दिउँसो ४ बजेर २० मिनेटमा आक्रमण गरेको थियो। भुजेल सोही वनभित्र घाँस दाउरा टिपेर फर्किने क्रममा वनसँगै जोडिएको यज्ञ ओलीको खेतबारीमा हात्तीसँग जम्काभेट भएको थियो।

हात्तीको आक्रमणबाट मृत्यु भएको भुजेलको शवलाई कानुनी प्रक्रिया पूरा गरी पोस्टमार्टमका लागि प्रादेशिक अस्पताल भद्रपुर ल्याइएको छ।