झापा, १८ असार । झापाकाे मेचीनगर र बुद्वशान्तिमा हात्तीको आक्रमणबाट एक वृद्धाको मृत्यु भएको छ भने एकजना घाइते भएका छन् । मृत्यु हुनेमा झापा मेचीनगर नगरपालिका – १० महानन्द टोलकी ८० वर्षीया पन्नादेवी साह रहेकी छन् ।
वडाध्यक्ष नारायण खनालका अनुसार दैनिक पूजाका लागि घरबाहिर निस्केकी साह बिहान ५ हात्तीको आक्रमणमा परेकी हुन् । घटघनास्थल घरसँगै जोडिएको छ। उनको घटनास्थलमै मृत्यु भएको वडाध्यक्ष खनालले जानकारी दिए । स्थायी घर भारत भएकी पन्नादेवी एक वर्ष अघिदेखि छोरी वसन्ती साहसँग बस्दै आएकी थिइन् । शव धुलाबारी प्रहरीले उठाउने तयारी गरिरहेको छ । महानन्दटोल धुलाबारीको व्यस्त बजार क्षेत्र हो । बजार क्षेत्रमै हात्ती छिरेर मानिसको ज्यान लिएपछि स्थानीय त्रसित भएका छन् ।
यस्तै, हात्तीको आक्रमणमा परी बुद्वशान्ति गाउँपालिका- ५ धिमाल गाउँकी ३८ बर्षीया कमला धिमाल घाइते भएकी छिन् । उनकाे उपचारकाे लागि विर्तामोड स्थित बिर्तासिटि अस्पतालमा लगिएकाे स्थानीयले जानकारी दिएका छन् । विहान ६ बजेकाे समयमा वगानमा काम गर्न जाने क्रममा हात्तीको आक्रमणमा परी घाइते भएकी थिइन् ।