झापा, ११ भदौ । सुनसरीको चतराघाटस्थित कोशी पुलको उदयपुर खण्डमा सवारीसाधन छाडेर बेपत्ता भएका झापा दमक नगरपालिका १ निवासी डाक्टर प्रज्वल कोईरालाको खोजीका लागि गोताखोर परिचालन गरिएको छ ।
हराएका डा. कोइरालाको खोजी गर्न सशस्त्र प्रहरीको गोताखोरको टोली र इलाका प्रहरी कार्यालय रामपुरबाट वरिष्ठ प्रहरी सहायक निरीक्षकको कमाण्डमा खटिएको प्रहरी टोलीले खोजी गरिरहेको जिल्ला प्रहरी कार्यालय उदयपुरका प्रवक्ता डिएसपी हरिनन्दन चौधरीले बताए ।
उनका अनुसार १-०२-००२ च ४१६६ नम्बरको कार छाडी चिकित्सक कोइराला बेपत्ता भएका हुन् । बेपत्ता भएका चिकित्सकको कोशी नदी र आसपासका क्षेत्र खोजी भइरहेको प्रहरीको भनाइ छ । स्थानीयबासीले बेवारिसे कार देखेपछि आज बिहान ४ बजे प्रहरीलाई खबर गरेका थिए ।
डा कोइराला राति २ बजे कोशीको पुलमा आएको सिसी टिभी फुजेटमा देखिएको प्रहरीले जनाएको छ । डा. कोइराला जनरल सर्जन हुन् । करिब तीन वर्ष लाइफलाइनमा काम गरेका डा. कोइराला एक साताअघि मात्रै मदन भण्डारी ट्रमा सेन्टर उर्लाबारी गएका थिए ।