मेचीनगर, १० जेठ । मेचीनगर–८ नम्बर वडामा गठबन्धनको नेपाली कांग्रेसबाट वडाध्यक्षका उम्मेद्वार गिरीराज धमला निर्वाचित भएका छन् । सोमबार राति ९ वजेको नतिजा अनुसार वडा नम्बर ८ को ६१३५ मतगणना हुँदा कांग्रेसबाट वडाध्यक्षका उम्मेद्वार धमलाले १७६९ मत ल्याएर निर्वाचित भएका हुन् ।
उनका प्रतिस्पर्धि एमालेका विकेन्द्र धिमाललाई २२१ मतको अन्तरले हराएर धमला विजयी भएका थिए । धिमालले १५४८ मत प्राप्त गरेको निर्वाचन अधिकृतको कार्यालय मेचीनगरले जनाएको छ । त्यसैगरी एमालेका तर्फबाट उम्मेद्वार बनेकी महिला वडा सदस्य मनकुमारी गिरीले १५७१, दलित महिला सदस्य कविता खनाल सार्कीले १६०४, पुरुष खुल्ला सदस्यमा कुन्दन निरौलाले १४३४ र विष्णु भट्टराईले १४९६ मत प्राप्त गरी बिजयी भएको कार्यालयले जनाएकाे छ ।
धमला २०७४ सालको स्थानीय तहको निर्वाचनमा एमालेका उनै धिमालसँग वडाध्यक्षमा पराजित भएका थिए । गठबन्धनले मेचीनगरमा १५, १४, ८ र ६ गरि चार वडा जितेकाे छ भने अन्य वडामा भने एमाले विजयी भएकाे छ ।